Бүгүн, 21-ноябрда, Кыргыз Республикасынын Эмгек, социалдык камсыздоо жана миграция министрлигине караштуу Жарандарды чет өлкөдө ишке орноштуруу борбору менен Россия Федерациясынын "Бест Торг" ЖЧКсынын (МАГНИТ чекене тармагы) ортосунда кызматташуу жөнүндө Макулдашууга кол коюлду.

"Магнит" Россиянын алдыңкы чекене тармактарынын бири, 28000ден ашуун соода түйүндөрү 67 аймакта жана 74 миллиондон ашык лоялдуулук программасынын катышуучулары бар. Компания ошондой эле өзүнүн азык-түлүктөрүн өндүрүү менен алектенет жана Россиянын чекене рыногуна олуттуу таасирин тийгизип, айыл чарба ишканаларын башкарат.

Кызматташтыктагы бул маанилүү кадам Россиядагы биздин жарандар үчүн жаңы мүмкүнчүлүктөрдү ачат жана чекене "Магнит"тармагында иштөөнү каалагандар үчүн уникалдуу мүмкүнчүлүктөрдү берет. Кызматташуу келишимине кол коюу эки тараптын ортосунда маанилүү өнөктөштүктүн башталышын билдирет.

Келишимде турак-жай, транспорттук чыгымдардын ордун толтуруу, ошондой эле тамак-аш менен камсыз кылуу сыяктуу маанилүү маселелер каралган. Мындан тышкары, айдоочулардын позицияларына өзгөчө көңүл бурулуп, жубайлар үчүн артыкчылык берилет, эмгек акынын деңгээли 138ден 226 миң рубльга чейин түзөт.

Жолугушуунун жүрүшүндө жумушка орношуу процессине байланыштуу маселелер, анын ичинде Кыргызстандан кызматкерлерди жалдоо жол-жоболору, потенциалдуу талапкерлер үчүн маалыматтык кампаниялар жана Россиядагы бош орундар тууралуу маалыматка жетүү маселелери талкууланды. Ошондой эле эмгекчи мигранттардын укуктарын коргоо аспекттери, анын ичинде алардын эмгектик укуктарын жана социалдык кепилдиктерин сактоо, мыйзамсыз ишке орноштурууну болтурбоо боюнча чаралар жана коргоо механизмдери чагылдырылган.

Бул келишим эки өлкөнүн ортосундагы мамилелерди бекемдөөдөгү маанилүү кадам болуп саналат жана социалдык-экономикалык өнүгүүнүн жаңы перспективаларын ачат.